शिंदेनगर येथे जमिनीच्या आणि कोर्टातील केसच्या वादातून ६० वर्षीय शेतकऱ्यावर कोयत्याने हल्ला; चौघांवर गुन्हा दाखल
फलटण तालुक्यातील शिंदेनगर येथे जमिनीच्या वादातून आणि जुन्या भांडणाची केस मिटवून घेण्यासाठी एका ६० वर्षीय शेतकऱ्यावर कोयत्याने हल्ला करण्यात आल्याची घटना घडली आहे. याप्रकरणी फलटण ग्रामीण पोलीस ठाण्यात चौघांवर गुन्हा दाखल करण्यात आला आहे.
स्थैर्य, फलटण, दि. 25 मार्च : शेताच्या बांधावरून आणि जमिनीच्या जुन्या वादातून हाणामारी होण्याच्या घटनांमध्ये वाढ होत आहे. फलटण तालुक्यातील शिंदेनगर येथे जमिनीच्या आणि कोर्टात सुरू असलेल्या केसच्या वादातून एका ६० वर्षीय ज्येष्ठ शेतकऱ्यावर धारदार ‘कोयत्याने’ हल्ला करण्यात आल्याचा धक्कादायक प्रकार समोर आला आहे. तसेच, भांडण सोडवण्यासाठी आलेल्या त्यांच्या पुतण्यालाही बेदम मारहाण करून जिवे मारण्याची धमकी देण्यात आली आहे. याप्रकरणी फलटण ग्रामीण पोलीस ठाण्यात चौघांविरुद्ध गुन्हा दाखल करण्यात आला आहे.
याप्रकरणी रामचंद्र ज्ञानबा शिर्के (वय ६० वर्षे, रा. देशमुखवाडी, ता. माळशिरस, जि. सोलापूर) यांनी फलटण ग्रामीण पोलिसांत फिर्याद दिली आहे.
पोलिसांनी दिलेल्या माहितीनुसार, फिर्यादी रामचंद्र शिर्के हे देशमुखवाडी येथे राहण्यास असून त्यांची शिंदेनगर (ता. फलटण) येथे स्वतःची शेतजमीन (गट नं. २२९/२) आहे. दिनांक २३ मार्च रोजी सायंकाळी ६:०० वाजेच्या सुमारास ते त्यांच्या शेतातील उसाच्या पिकाला पाणी देत होते.
त्याचवेळी त्यांच्या शेजारी राहणारा दत्तात्रेय यशवंत जगदाळे हा तिथे आला आणि त्याने जमिनीच्या कारणावरून वाद घालायला सुरुवात केली. वाद वाढल्यानंतर त्याने कोणालातरी फोन केला. थोड्याच वेळात तिथे एका ओमणी गाडीतून गणेश दत्तात्रेय जगदाळे आणि किसन वसंत जगदाळे हे दोघे आले. त्यांनी फिर्यादीला शिवीगाळ सुरू केली. हा आवाज ऐकून जवळच शेतात काम करणारा श्रीकांत नामदेव जगदाळे हादेखील तिथे आला.
या चौघांनी संगनमत करून, “जुन्या भांडणाची केस मिटवून घे,” असे म्हणत रामचंद्र शिर्के यांना शिवीगाळ केली. यावेळी श्रीकांत जगदाळे याने त्याच्या हातातील धारदार कोयत्याने रामचंद्र यांच्या उजव्या हाताच्या मधल्या बोटावर मारून त्यांना गंभीर जखमी केले.
भांडणाचा आणि आरडाओरड्याचा आवाज ऐकून फिर्यादीचा पुतण्या रणजित अंकुश शिर्के हा तिथे भांडण सोडवण्यासाठी धावून आला. मात्र, आरोपी गणेश, किसन, श्रीकांत आणि दत्तात्रेय जगदाळे या चौघांनी मिळून रणजित यालाही हाताने व लाथाबुक्क्यांनी बेदम मारहाण केली. तसेच, कोर्टातील केसचा राग मनात धरून दोघांनाही जिवे मारण्याची धमकी देऊन तेथून पोबारा केला.
याप्रकरणी जखमी रामचंद्र शिर्के यांच्या फिर्यादीवरून फलटण ग्रामीण पोलीस ठाण्यात खालील चार जणांवर गुन्हा दाखल करण्यात आला आहे: १) गणेश दत्तात्रेय जगदाळे २) किसन वसंत जगदाळे ३) श्रीकांत नामदेव जगदाळे ४) दत्तात्रेय यशवंत जगदाळे (सर्व रा. देशमुखवाडी, ता. माळशिरस, जि. सोलापूर)
गुन्हा दाखल झाल्यानंतर फलटण ग्रामीण पोलीस या प्रकरणाचा अधिक तपास करत आहेत.
