सातार्‍यात 52 जनावरांना लम्पी त्वचारोगाची बाधा
दैनिक स्थैर्य । 8 जुलै 2025 । सातारा । ऐनपावसाळ्याच्या दिवसात जिल्ह्यात पुन्हा एकदा जनावरांच्या लम्पी त्वचारोगाचा प्रादुर्भाव वाढू लागला आहे. सातारा, खटाव, फलटण, कोरेगाव व माण तालुक्यातील 52 जनावरे लम्पी त्वचारोगाने बाधित आहेत. लम्पीच्या पार्श्वभूमीवर पशुसंवर्धन विभाग सतर्क झाला असून, विविध उपाययोजना राबवण्यास सुरुवात करण्यात आली आहे.
सातारा जिल्ह्यात मे महिन्यापासून पावसाळी वातावरण आहे. त्यामुळे जनावरांच्या लम्पी त्वचारोगाने जिल्ह्यात डोके वर काढले आहे. त्यामुळे जिल्हा परिषदेसह राज्य शासनाचा पशुसंवर्धन विभाग सतर्क झाला आहे. पशुसंवर्धन विभागाने सातारा जिल्ह्यात युद्धपातळीवर लसीकरण मोहीम राबवली आहे.
ज्या ज्या ठिकाणी लसीकरणात जी जनावरे चुकली आहेत, त्या ठिकाणी पुन्हा प्राधान्याने लसीकरण मोहीम राबविली जात आहे. जिल्ह्यातीलसातारा तालुक्यात 14, खटाव 8, फलटण 5, कोरेगाव 18, माण 7 असे मिळून 52 जनावरे लम्पी त्वचारोगाने बाधित झाली आहेत. ज्या ठिकाणी लम्पी त्वचारोगामुळे जनावरे बाधित झाली आहेत, अशा जनावरांवर पशुसंवर्धन विभागामार्फत औषधोपचार करण्यात येत आहेत.
लम्पीची लक्षणे आढळल्यास पशुवैद्यकीय अधिकार्‍याकडूनच जनावराची तपासणी करून घ्यावी. गोठ्यात गायी व म्हशींना एकत्रित बांधू नये. रोगाचा प्रसार कीटकामार्फत होत असल्यामुळे कीटकांवर नियंत्रण ठेवण्यासाठी गोठ्यांची स्वच्छता ठेवणे गरजेचे आहे. परिसरात स्वच्छता राखावी व निर्जंतुक द्रावणाने परिसरात फवारणी करावी. जनावरांच्या पिण्याच्या पाण्याकरिता व चारा खाण्यासाठी स्वतंत्र व्यवस्था करावी. याचबरोबर लम्पीची लक्षणे आढळल्यास पशुसंवर्धन विभागाशी संपर्क साधावा.
जनावरांच्या लम्पी आजाराच्या पार्श्वभूमीवर पशुसंवर्धन विभागामार्फत बाधित झालेल्या ठिकाणी सर्वेक्षणाचे काम सुरू आहे. ज्या ठिकाणी जनावरे आजारी आहेत, त्यांच्यावर औषधोपचार करण्यात येत असून, पशुपालकांनी जनावरांना लम्पीची लक्षणे आढळल्यास नजीकच्या पशुसंवर्धन अधिकार्‍यांशी संपर्क करून माहिती द्यावी.
– डॉ. विनोद पवार, जिल्हा पशुसंवर्धन अधिकारी
