पोलिसांत तक्रार दिल्याच्या रागातून सस्तेवाडीत ५० वर्षीय महिलेस शेजाऱ्यांकडून बेदम मारहाण; चौघांवर गुन्हा दाखल
सस्तेवाडी (ता. फलटण) येथे जागेच्या कारणावरून पोलिसांत तक्रार दिल्याच्या रागातून एका ५० वर्षीय महिलेला शेजाऱ्यांनी लाकडी काठीने व लाथाबुक्क्यांनी बेदम मारहाण केल्याची घटना घडली आहे. याप्रकरणी चौघांवर फलटण ग्रामीण पोलीस ठाण्यात गुन्हा दाखल करण्यात आला आहे.
स्थैर्य, फलटण : ‘तू या जागेची मालकीण लागून गेलीस का? येथे राहायचे नाही’ असे म्हणत दमदाटी केल्याप्रकरणी पोलिसांत तक्रार दिल्याच्या रागातून एका ५० वर्षीय महिलेला शेजाऱ्यांनीच लाकडी काठीने व लाथाबुक्क्यांनी बेदम मारहाण केल्याची धक्कादायक घटना सस्तेवाडी (ता. फलटण) येथे घडली आहे. याप्रकरणी मारहाण करणाऱ्या चार शेजाऱ्यांवर फलटण ग्रामीण पोलीस ठाण्यात गुन्हा दाखल करण्यात आला आहे.
याप्रकरणी जखमी अंजना जयवंत यादव (वय ५० वर्षे, व्यवसाय- मजुरी, रा. सस्तेवाडी, ता. फलटण) यांनी फलटण ग्रामीण पोलीस ठाण्यात फिर्याद दिली आहे.
गुन्हा दाखल करण्यात आलेल्यांची नावे:
१) राहुल रामा करे २) बुवा राम करे ३) सविता राहुल करे ४) संगिता नाना करे (सर्व रा. सस्तेवाडी, ता. फलटण)
पोलिसांनी दिलेल्या माहितीनुसार आणि दाखल झालेल्या फिर्यादीनुसार, अंजना यादव या सस्तेवाडी येथे एकट्याच राहतात. त्यांच्या शेजारीच आरोपी राहण्यास आहेत. दि. २३ मार्च रोजी राहुल करे, बुवा करे, सविता करे आणि संगिता करे यांनी अंजना यांना, “तू या जागेची मालकीण लागून गेलीस का? येथे राहायचे नाही,” असे म्हणून शिवीगाळ व दमदाटी केली होती. या त्रासाला कंटाळून अंजना यादव यांनी फलटण ग्रामीण पोलीस ठाण्यात त्यांच्याविरुद्ध तक्रार दिली होती.
तक्रार देऊन परतताना गाठून मारहाण:
ही तक्रार देऊन त्याच दिवशी (दि. २३ मार्च) रात्री ८:०० वाजेच्या सुमारास अंजना यादव या हनुमान नगर पाण्याच्या टाकीपासून आपल्या घरी पायी चालत जात होत्या. त्यावेळी चारही आरोपींनी त्यांना रस्त्यात गाठले. ‘तू आमच्याविरुद्ध पोलीस ठाण्यात तक्रार का दिली?’ अशी विचारणा करत सर्वांनी त्यांना शिवीगाळ करून हाताने व लाथाबुक्क्यांनी बेदम मारहाण करण्यास सुरुवात केली.
याचदरम्यान, आरोपी राहुल करे याने तिथे पडलेल्या लाकडी काठीने अंजना यांच्या पाठीत जोरात मारून त्यांना गंभीर जखमी केले. या मारहाणीनंतर अंजना यादव यांनी पुन्हा पोलीस ठाण्यात धाव घेतली. पोलिसांनी त्यांना उपचारासाठी प्रथम फलटण येथील सरकारी दवाखान्यात (उपजिल्हा रुग्णालय) पाठवले. तेथे वैद्यकीय उपचार घेतल्यानंतर अंजना यादव यांनी दिलेल्या खबरी जबाबावरून चारही आरोपींविरुद्ध फलटण ग्रामीण पोलिसांत मारहाणीचा गुन्हा दाखल करण्यात आला आहे. पोलीस या प्रकरणाचा अधिक तपास करत आहेत.
