एसटी बसच्या गर्दीत वृद्धेच्या पर्समधून तब्बल ५ तोळ्यांचे सोन्याचे दागिने लंपास! आजच्या बाजारभावाप्रमाणे सात लाखांचा ऐवज चोरीला; फलटण पोलिसांत गुन्हा दाखल

फलटण बसस्थानकातून सास्कलकडे जाणाऱ्या एसटी बसमध्ये गर्दीचा फायदा घेत अज्ञात चोरट्याने एका ६० वर्षीय वृद्धेच्या पर्समधील ५ तोळे वजनाचे (अंदाजे ७ लाख १० हजार रुपये किमतीचे) सोन्याचे दागिने चोरून नेल्याची घटना उघडकीस आली आहे.

स्थैर्य, फलटण, दि. 21 मार्च : फलटण एसटी बसस्थानकातून प्रवास करणाऱ्या प्रवाशांच्या, विशेषतः महिलांच्या दागिन्यांवर डल्ला मारणाऱ्या चोरट्यांचा सुळसुळाट पुन्हा वाढला आहे. फलटण-धुमाळवाडी बसने सास्कल (ता. फलटण) येथे जाणाऱ्या एका ६० वर्षीय वृद्ध महिलेच्या पर्समधील तब्बल ५ तोळे वजनाचे सोन्याचे दागिने अज्ञात चोरट्याने गर्दीचा फायदा घेत हातोहात लंपास केले आहेत. आजच्या सोन्याच्या भडकलेल्या बाजारभावाचा विचार करता, चोरीला गेलेल्या या दागिन्यांची किंमत तब्बल सात लाखांच्या घरात (अंदाजे ७ लाख १० हजार रुपये) आहे.

याप्रकरणी शांताबाई बाळासाहेब जाधव (वय ६० वर्षे, व्यवसाय घरकाम, रा. तांबखडा, ता. फलटण) यांनी फलटण शहर पोलीस स्टेशनमध्ये अज्ञात चोरट्याविरुद्ध रीतसर फिर्याद नोंदवली आहे.

फलटण शहर पोलिसांनी दिलेल्या सविस्तर माहितीनुसार, फिर्यादी शांताबाई जाधव या १६ मार्च रोजी आपल्या भावाच्या (विठ्ठल पवार) नवीन घराच्या वास्तूशांतीच्या कार्यक्रमासाठी सास्कल (ता. फलटण) येथे जाण्यास निघाल्या होत्या. त्यासाठी त्या दुपारी २:०० वाजण्याच्या सुमारास फलटण एसटी बसस्थानक येथे आल्या. प्लॅटफॉर्म क्रमांक ०४ वरून फलटण-धुमाळवाडी (किंवा गिरवी) कडे जाणाऱ्या बसची त्या वाट पाहत होत्या. दुपारी २:१५ वाजता बस आल्यावर त्या आत चढत होत्या.

बसमध्ये चढताना झालेल्या गर्दीत त्यांच्या गळ्यातील सोन्याच्या पट्टीतील मिनीगंठण तुटून खाली पडले. त्यांनी ते तत्काळ उचलले आणि बसमध्ये चढल्यानंतर सुरक्षिततेसाठी ते आपल्या पर्समध्ये ठेवले. तसेच, बसमधील गर्दीत आणखी काही चोरी होऊ नये म्हणून त्यांनी आपल्या गळ्यातील काळ्या मण्यांत गुंफलेले आणि दोन वाट्या असलेले ४ तोळे वजनाचे सोन्याचे मंगळसूत्रही काढून पर्समध्येच ठेवले.

दुपारी ३:०० वाजण्याच्या सुमारास बस सास्कल फाटा येथे पोहोचल्यानंतर शांताबाई खाली उतरल्या. कार्यक्रमाला जाण्यापूर्वी त्यांनी पर्समधून दागिने काढून गळ्यात घालण्यासाठी पाहिले असता, त्यांना मोठा धक्काच बसला. त्यांच्या पर्समध्ये ठेवलेले ४ तोळ्यांचे सोन्याचे मंगळसूत्र आणि १ तोळ्याचे सोन्याचे मिनीगंठण गायब होते. त्यांनी पर्सची बारकाईने शोधाशोध केली, परंतु दागिने कुठेही मिळून आले नाहीत. फलटण ते सास्कल या प्रवासादरम्यान एसटी बसमधील गर्दीचा फायदा घेत कोणीतरी अज्ञात चोरट्याने अत्यंत शिताफीने हे दागिने पर्समधून चोरून नेल्याची त्यांची खात्री पटली.

आजच्या भावानुसार तब्बल सात लाखांचा ऐवज चोरीला!

पोलीस फिर्यादीमध्ये या दागिन्यांची जुनी खरेदी किंमत (५० हजार रुपये) नमूद असली तरी, सध्या सोन्याच्या दराने उच्चांक गाठला आहे. आज (दि. २१ मार्च) बाजारात २२ कॅरेट सोन्याचा प्रति तोळा (१० ग्रॅम) दर अंदाजे १ लाख ४२ हजार रुपयांच्या घरात पोहोचला आहे. त्यानुसार, चोरीला गेलेल्या या एकूण ५ तोळे (५० ग्रॅम) सोन्याच्या दागिन्यांची आजच्या बाजारभावाप्रमाणे एकूण किंमत तब्बल ७ लाख १० हजार रुपयांच्या आसपास होत आहे.

ऐन वास्तूशांतीच्या मंगल कार्याला जातानाच महिलेचे ५ तोळ्यांचे दागिने चोरीला गेल्याने सर्वत्र हळहळ व्यक्त केली जात आहे. याप्रकरणी फलटण शहर पोलीस स्टेशनमध्ये अज्ञात चोरट्याविरुद्ध चोरीचा गुन्हा दाखल करण्यात आला असून, प्रवाशांनी, विशेषतः महिलांनी बसमधून प्रवास करताना आपल्या मौल्यवान वस्तू आणि दागिन्यांची विशेष काळजी घ्यावी, असे आवाहन पोलिसांकडून करण्यात आले आहे.