मोबाईलवर चॅटिंग केल्याच्या रागातून ढवळ पाटी येथे १८ वर्षीय युवकाची निर्घृण हत्या; चार जणांवर खुनाचा गुन्हा दाखल
फलटण तालुक्यातील ढवळ पाटी येथे एका मुलीसोबत मोबाईलवर चॅटिंग केल्याच्या कारणावरून सोमनाथ जाधव या १८ वर्षीय युवकाला चार जणांनी बेदम मारहाण करून खून केल्याची खळबळजनक घटना उघडकीस आली आहे. याप्रकरणी फलटण ग्रामीण पोलिसांत गुन्हा दाखल करण्यात आला आहे.
स्थैर्य, फलटण, दि. १० एप्रिल : एका मुलीसोबत मोबाईलवर चॅटिंग केल्याच्या रागातून १८ वर्षीय युवकाला चार जणांनी लाथाबुक्क्यांनी बेदम मारहाण करत त्याची निर्घृण हत्या केल्याची अत्यंत धक्कादायक आणि थरारक घटना आज (दि. १०) मध्यरात्री ढवळ पाटी (ता. फलटण) येथे घडली आहे. या घटनेमुळे फलटण तालुक्यात मोठी खळबळ उडाली असून, या प्रकरणी मृत युवकाच्या वडिलांनी दिलेल्या फिर्यादीवरून चार जणांविरुद्ध फलटण ग्रामीण पोलीस ठाण्यात खुनाचा गुन्हा दाखल करण्यात आला आहे.
सोमनाथ संदीप जाधव (वय १८ वर्षे, रा. दालवडी, ता. फलटण) असे या अमानुष मारहाणीत दुर्दैवी मृत्यू झालेल्या युवकाचे नाव आहे.
पोलिसांनी दिलेल्या माहितीनुसार आणि दाखल एफआयआरमध्ये (FIR) नमूद केल्याप्रमाणे, मृत सोमनाथ हा दि. ९ एप्रिलच्या रात्री जेवण करून घराबाहेर अंगणात झोपला होता. रात्री १:०० वाजेच्या सुमारास सोमनाथच्या वडिलांच्या (संदीप जाधव) मोबाईलवर सोमनाथच्याच नंबरवरून एका व्यक्तीचा फोन आला. त्या व्यक्तीने त्यांना तात्काळ ‘ढवळ पाटी’ येथे बोलावून घेतले.
वडील तिथे पोहोचले असता, एका लाल रंगाच्या स्विफ्ट कारमधून दोन जण आणि त्यांचा मुलगा सोमनाथ खाली उतरले. त्या व्यक्तींनी वडिलांना सांगितले की, “तुमचा मुलगा आमच्या बहिणीशी मोबाईलवर चॅटिंग करत आहे, त्यामुळे आम्ही त्याला मारहाण केली असून आता त्याला जिवंत ठेवणार नाही.” असे सांगत असतानाच तिथे आणखी दोन जण मोटारसायकलवरून आले.
लाथाबुक्क्यांनी बेदम मारहाण आणि हत्या:
त्यानंतर या चौघांनी मिळून सोमनाथला लाथाबुक्क्यांनी तोंडावर, छातीवर आणि पोटावर अमानुष मारहाण करण्यास सुरुवात केली. जीव वाचवण्यासाठी सोमनाथ पळू लागला, मात्र आरोपींनी त्याचा पाठलाग करून ढवळ पाटीवरील कृषी उत्पन्न बाजार समितीच्या कार्यालयाजवळील पटांगणात त्याला गाठले. तिथे त्याला पुन्हा बेदम मारहाण करून डांबरी रस्त्यावर आपटले. यावेळी एका स्थानिक नागरिकाने मदतीसाठी धाव घेतली असता, ते चौघेही आरोपी कार आणि दुचाकीवरून पसार झाले.
या गंभीर मारहाणीत सोमनाथ बेशुद्ध पडला होता. त्याला उपचारांसाठी तात्काळ फलटण येथील विविध रुग्णालयांत नेण्यात आले, मात्र उपचारादरम्यान त्याची प्राणज्योत मालवली.
या धक्कादायक घटनेप्रकरणी मृत सोमनाथचे वडील संदीप उमाजी जाधव (वय ४२) यांनी दिलेल्या फिर्यादीवरून फलटण ग्रामीण पोलीस ठाण्यात मुलीच्या नातेवाईकांसह एकूण चार जणांविरुद्ध खुनाचा (Murder) गुन्हा दाखल करण्यात आला आहे. प्रकरणाचे गांभीर्य ओळखून पोलीस अधिक तपास करत आहेत.
