शंकरराव चव्हाण सुवर्ण महोत्सवी पत्रकार कल्याण निधीमध्ये 15 कोटींची वाढ
दैनिक स्थैर्य । दि. ११ मार्च २०२२ । फलटण । महाराष्ट्र पत्रकार कल्याण निधीच्या मागणीनुसार राज्याचे उपमुख्यमंत्री तथा अर्थमंत्री ना.अजितदादा पवार यांनी आज विधीमंडळात सादर केलेल्या सन 2022 – 23 च्या अर्थसंकल्पात शासनाच्या शंकरराव चव्हाण सुवर्ण महोत्सवी पत्रकार कल्याण निधीमध्ये 15 कोटी रुपयांची भरघोस वाढ केल्याबद्दल संस्थेच्यावतीने अध्यक्ष रविंद्र बेडकिहाळ, उपाध्यक्ष बापूसाहेब जाधव, कृष्णा शेवडीकर, कार्यकारी विश्‍वस्त विजय मांडके यांनी मुख्यमंत्री ना.उद्धव ठाकरे, उपमुख्यमंत्री ना.अजितदादा पवार यांना धन्यवाद दिले आहेत.
याबाबत रविंद्र बेडकिहाळ यांनी सांगितले की, ‘‘शासनाच्या शंकरराव चव्हाण सुवर्ण महोत्सवी पत्रकार कल्याण निधीमार्फत पत्रकारांना निवृत्ती वेतन, वैद्यकीय उपचारांसाठी मदत आदी आर्थिक सहाय्य केले जाते. मात्र अपुर्‍या निधी अभावी ही मदत देण्यावर बंधने येत आहेत. या अनुषंगाने या कल्याण निधीसाठी राज्याच्या अर्थसंकल्पात दरवर्षी रु.10 कोटीच्या कायम निधीची तरतूद यावर्षापासून करावी अशी मागणी महाराष्ट्र पत्रकार कल्याण निधीच्यावतीने राज्याचे उपमुख्यमंत्री ना.अजितदादा पवार यांच्याकडे करण्यात आली होती. संस्थेच्या या मागणीला सकारात्मक प्रतिसाद देत ना.अजितदादा पवार यांनी आज राज्य अर्थसंकल्प मांडताना, आचार्य बाळशास्त्री जांभेकर ज्येष्ठ पत्रकार सन्मान योजनेअंतर्गत शंकरराव चव्हाण सुवर्ण महोत्सवी पत्रकार कल्याण निधीच्या व्याजातून ज्येष्ठ पत्रकारांना दरमहा निवृत्तीवेतन देण्यात येते. हा कल्याण निधी सध्या 35 कोटी रुपयांचा असून त्यात वाढ करुन तो 50 कोटी करण्यात येत आहे, अशी घोषणा केली. याबद्दल संस्था राज्याचे मुख्यमंत्री व उपमुख्यमंत्री यांना धन्यवाद देत आहे. पत्रकार सन्मान योजनेच्या पात्रतेच्या क्लिष्ट अटी शिथील कराव्यात, पत्रकारांना आरोग्य विषयक अडचणीत योग्य व तातडीची मदत व्हावी, पत्रकारांसंबंधीच्या शासकीय समित्यांचे पुर्नगठण करावे आदी मागण्यांसाठीही मुख्यमंत्री व उपमुख्यमंत्र्यांकडे संस्थेचा पाठपुरावा सुरु आहे’’, असेही बेडकिहाळ यांनी नमूद केले.
