शहीद सुभेदार विजय शिंदे यांना साश्रू नयनांनी अखेरचा निरोप
दैनिक स्थैर्य । दि. ३० मे २०२२ । पुसेगाव । लेह-लडाखमध्ये देशसेवा बजावत असताना शहीद झालेले सुभेदार विजय सर्जेराव शिंदे यांना रविवारी दुपारी दिड वाजता खटाव तालुक्यातील विसापूर येथे साश्रू नयनांनी अखेरचा निरोप देण्यात आला. विजय शिंदे अमर रहेच्या घोषणा करीत हजोरा नागरिकांनी विसापूरच्या भूमिपुत्रास सलाम केला. सुभेदार विजय यांच्या पार्थिवावर आज शोकाकूल वातावरणात शासकीय इतमामात अंत्यसंस्कार करण्यात आले. शहीद विजय शिंदे यांच्या पार्थिवाचे’ अंत्यदर्शन घेण्यासाठी विसापूरात हजारोंचा जनसमुदाय लोटला होता. त्यांच्या पाठीमागे आई, पत्नी, दोन जुळ्या मुली, दोन भाऊ असा परिवार आहे.
विसापूर गावाला देशसेवेची फार मोठी परंपरा आहे. गावातील बहुतांशी युवक देशाचे संरक्षण करण्यासाठी लष्कर सेवेत कार्यरत आहेत. विजय शिंदे यांचे वडील सर्जेराव धोंडिबा शिंदे हे देखील लष्करात 22 मराठा लाइट इन्फंट्रीमध्ये सुभेदार पदावरून सेवानिवृत्त झाले होते. सुमारे तीन-चार वर्षांपूर्वी त्यांचे निधन झाले. गावची सैनिकी परंपरा, वडील सर्जेराव शिंदे मोठा भाऊ प्रमोद शिंदे यांचा देशसेवेचा आदर्श डोळ्यासमोर ठेऊन कोणत्याही परिस्थितीत देश सेवेत जायचंच हे स्वप्न उराशी बाळगून विजय शिंदे यांनीही शिक्षणाचे धडे घेतले. प्राथमिक, माध्यमिक शिक्षण विसापूर येथे तर उच्च माध्यमिक शिक्षण पुसेगाव येथे घेतले.
विजय शिंदे हे वयाच्या 17व्या वर्षी 22 मराठा लाइट इन्फंट्री लष्करी सेवेत रुजू झाले. 24 वर्षाच्या कालावधीत त्यांनी लष्करात विविध ठिकाणी काम करून देशाचे संरक्षण केले. सध्या त्यांचे पोस्टींग लेह-लडाख येथे होते. सुभेदार पदावर ते कार्यरत होते. 26 जवानांचे परतापूरच्या संक्रमण शिबिरातून उप-सेक्टर हनिफच्या फॉरवर्डकडे जात असताना लष्कराचे वाहन रस्त्यावरून घसरून श्‍लोक नदीत पडले. या अपघातात 7 सैनिकांना वीरगती मिळाली. त्यात सुभेदार विजय शिंदे यांचा समावेश होता.
सकाळ पासून पार्थिव विसापूरात येथे येणार असल्याने गर्दी जमायला सुरुवात झाली होती. आज सकाळी साडेदहा वाजता पन्नास तासाच्या प्रतिक्षेनंतर शहीद विजय सर्जेराव शिंदे यांचे पार्थिव कुटुंबीय व नातेवाईकांना अंत्यदर्शनासाठी ठेवले होते. शहीद विजय शिंदे यांचे पार्थिव दिसताक्षणी वीरपत्नी प्रिया शिंदे, मुली दिया, रिया, वीरमाता अरुणा शिंदे, भाऊ प्रमोद व हणमंत शिंदे यांच्यासह कुटुंबीय हंबरडा फोडला. त्यांचाा पाहून उपस्थितांच्या डोळ्यातून पाणी येऊ लागले. विसापूर येथील मुख्य रस्त्याच्या स्वागत कमानीपासून आकर्षक फुलांनी सजवलेल्या रथातून शहीद सुभेदार विजय शिंदे यांच्या अंत्ययात्रेस प्रारंभ झाला. विजय शिंदे अमर रहे, भारत माता की जय अशा घोषणा उपस्थितांनी दिल्या. रथापुढे एक स्पीकर गाडी जोडून देशभक्तीपर गीते लावली होती, संपुर्ण वातावरण देशभक्तीचे निर्माण झाले होते. गावातील मुलींनी संपूर्ण अंत्ययात्रा मार्गावर फुले टाकण्यात आली होती. रस्त्याच्या दुतर्फा आकर्षक रंगीबेरंगी रांगोळी काढली होती. युवक व ग्रामस्थांनी अंत्ययात्रा मार्गावर व चौकाचौकात वीर जवान तुझे सलाम, विजय शिंदे अमर रहे असे देशभक्ती पर फ्लेक्स बोर्ड लावले होते. अंत्ययात्रा झाल्यानंतर शहीद विजय शिंदे यांचे पार्थिव श्री वाघेश्‍वरी मंदिरा लगतील चौकात स्टेजवर नागरिकांना अंत्यदर्शनासाठी ठेवले होते. त्यानंतर कुंभारकी शिवारात होणार्‍या अंत्यविधी कार्यक्रमस्थळी रथातून पार्थिव नेण्यात आले. यावेळी खासदार श्रीनिवास पाटील, सातारा जिल्ह्याचे पालकमंत्री ना. बाळासाहेब पाटील , आमदार महेश शिंदे, माजी सभापती भिमराव पाटील, सातारा जिल्हा परिषदेचे उपाध्यक्ष प्रदीप विधाते, राष्ट्रीय काँग्रेसचे जिल्हाध्यक्ष डॉ. सुरेश जाधव, माजी पोलीस महानिरीक्षक भुजंगराव शिंदे, पोलीस उपविभागीय अधिकारी गणेश किंद्रे, तहसीलदार किरण जमदाडे, सपोनि संदीप शितोळे, श्री सेवागिरी देवस्थान ट्रस्टचे विश्‍वस्त रणधीर जाधव, कमांडर विजय पाटील, मंडलाधिकारी साबळे, मानाजीराव घाडगे, बंडा गोडसे, माजी सभापती संदीप मांडवे, माजी सरपंच सागर साळुंखे, चेअरमन राहुल पाटील, यांच्यासह सैन्य दलातील अधिकारी जवानांनी पुष्पचक्र वाहून श्रद्धांजली वाहिली. शहीद सुभेदार विजय शिंदे यांच्या पार्थिवास पुतण्या आकाश शिंदे व मुली परी व रिया यांनी मुखाग्नी दिला. 22 मराठा लाईट इन्फंट्री सैन्यदल व सातारा पोलीस दलाच्यावतीने बिगुल वाजवून व बंदुकीच्या तीन फैरी झाडून मानवंदना देण्यात आली. सर्व धार्मिक विधी करण्यात आला.अंत्यसंस्काराला हजारोंचा जनसागर उपस्थित होता. त्यावेळी अनेकांच्या अश्रुचा बांध फुटला.
सातारा जिल्ह्याने विजय शिंदे सारखा एक वीर गमावला : पालकमंत्री
लेह लडाख येथे भारतमातेचे संरक्षण करीत असताना विसापूरचे सुपुत्र सुभेदार विजय शिंदे हे शहिद झाले. त्यांच्या निधनाने भारत मातेने एक वीर सुपुत्र गमावला आहे. शिंदे कुटुंबासोबतच संपूर्ण जिल्ह्यावर दुःखाचा डोंगर कोसळला आहे. शहीद सुभेदार विजय शिंदे यांच्या दुःखात संपूर्ण सातारा जिल्हा सहभागी आहे. ईश्‍वर त्यांच्या आत्म्यास चिरशांती देवो हीच प्रार्थना करतो, अशी भावपूर्ण श्रद्धांजली सातारा जिल्ह्याचे पालकमंत्री बाळासाहेब पाटील यांनी वाहिली.
विजय शिंदे यांचे कार्य अमर राहील : खा. श्रीनिवास पाटील
सातारा जिल्हा शूरवीरांचा व क्रांतिकारकांचा म्हणुन संपुर्ण देशभरात ओळखला जातो. देशसेवेची परंपरा जोपासण्याचे काम विसापूर गावातील अनेक युवक करीत आहेत. लेह लडाख येथे सुभेदार विजय शिंदे हे देशसेवेचे कर्तव्य बजावत असताना ते शहीद झाले. देशाप्रती असणारे शहीद विजय शिंदे यांचे कार्य अमर राहील, अशी प्रतिक्रिया श्रद्धांजली वाहताना सातारा लोकसभा मतदारसंघाचे खा. श्रीनिवास पाटील यांनी व्यक्त केली.
