मंगळवार पेठेतील विकासकामे तातडीने मार्गी लावा; डॉ. बाबासाहेब आंबेडकर जयंती मंडळातर्फे मुख्याधिकार्यांना निवेदन
दैनिक स्थैर्य । दि. ११ जुन २०२२ । फलटण । शहराच्या मंगळवार पेठेतील नगरपरिषदेच्या माध्यमातून करण्यात येणारी विकासकामे ही रखडली आहेत. तरी मंगळवार पेठेतील प्रस्थापित असलेली व रखडलेली सर्व विकासकामे तातडीने मार्गी लावण्यात यावी, असे निवेदन डॉ. बाबासाहेब आंबेडकर जयंती मंडळाच्यावतीने पदाधिकाऱ्यांनी दिले.
फलटण नगरपरिषदेचे मुख्याधिकारी तथा प्रशासक संजय गायकवाड यांना डॉ. बाबासाहेब आंबेडकर जयंती मंडळाच्यावतीने अध्यक्ष ॲड. अनिकेत अहिवळे, उपाध्यक्ष कुणाल काकडे, खजिनदार गौतम अहिवळे यांच्यासह पदाधिकारी उपस्थित होते.
सदरील निवेदनात मंगळवार पेठेतील निळी तालीम जिमचे वॉटर प्रूफिंग करण्याबाबत(नुकत्याच पावसामुळे झालेले नुकसान लक्षात घेता), लायब्ररी आणि जिम मधील पाण्याची टाकी आणि पाण्याची मोटर बसवण्याबाबत, समाजमंदिर शेजारील सौचालये, कुरेशी नगर शेजारील सौचालये, माता भिमाई नगर येथील सौचालये, सिद्धार्थ हौसिंग सोसायटी येथील सौचालये, भीम नगर मधील सौचालये तसेच मच्छी मार्केट येथील सौचालये यांच्या दुरुस्ती तसेच काहींचे नव्याने बांधकाम करण्यासाठी, रस्त्यांची नवीन कामे करताना तो व्यवस्थित खंदुन बनवण्या बाबत (कारण रस्त्यांची उंची वाढली असून पावसाचे पाणी घरात येत आहे), धम्मयान चौक ते जुना आंबेडर चौक येथील रस्ता बनवण्यासाठी कामे तातडीने करावीत असे स्पष्ट केले आहे.
सदरील निवेदनावर मुख्याधिकारी तथा प्रसासक संजय गायकवाड यांनी सकारात्मक प्रतिसाद देत निवेदनातील कामांची पाहणी करण्यासाठी नगरपरिषदेचे अभियंता सुध्दा तातडीने दाखल झाल्याने त्यांचे सुध्दा आभार यावेळी मानण्यात आले.
